மோடி – விஜய் இணைந்து தமிழக வளர்ச்சிப் பயணம்! கோவை, மதுரை மெட்ரோ திட்டங்களுக்கு ஒப்புதல் தர பிரதமரிடம் முதல்வர் வலியுறுத்தல்!

செய்தி: ம.பா. கெஜராஜ்,
சென்னை, அக். 11:
“முதல்வர் விஜய்யுடன் இணைந்து தமிழகத்தின் வளர்ச்சிப் பயணத்தை முன்னெடுத்துச் செல்வேன்” என்று பிரதமர் நரேந்திர மோடி உறுதியளித்துள்ள நிலையில், கோவை, மதுரை மெட்ரோ ரயில் திட்டங்களை மறுபரிசீலனை செய்து ஒப்புதல் வழங்க வேண்டும் என்று முதல்வர் விஜய் வலியுறுத்தியுள்ளார். நதிநீர் இணைப்பு கோரிக்கையும் முன் வைத்தார். 

சென்னையில் இன்று நடைபெற்ற நிகழ்ச்சியில் பிரதமர் மோடியும், தமிழக முதல்வர் விஜய்யும் இணைந்து பூந்தமல்லி – வடபழனி மெட்ரோ ரயில் சேவையைத் தொடங்கி வைத்து, மெட்ரோ ரயிலிலும் பயணித்தனர்.

“தமிழக வளர்ச்சிக்கு மத்திய அரசு துணை நிற்கும்!”

சென்னை ஐஐடி வளாகத்தில் நடைபெற்ற நிகழ்ச்சியில் பேசிய பிரதமர் மோடி, தமிழகத்தின் வளர்ச்சிக்காக முதல்வர் விஜய்யுடன் இணைந்து பணியாற்றப் போவதாகத் தெரிவித்தார்.

தமிழகத்தில் ஆட்சிகள் மாறினாலும், தமிழகத்தின் வளர்ச்சிக்காகவும் மக்களுக்குச் சேவை செய்வதற்குமான தனது உறுதிப்பாடு மாறவில்லை என்று குறிப்பிட்ட பிரதமர், மாநிலங்களின் வளர்ச்சியே நாட்டின் முன்னேற்றம் என்ற அடிப்படையில் செயல்பட்டு வருவதாகக் கூறினார்.

சென்னையில் ரூ.13,000 கோடிக்கும் அதிகமான மதிப்பிலான வளர்ச்சித் திட்டங்களுக்கு அடிக்கல் நாட்டியும், நிறைவடைந்த திட்டங்களைத் தொடங்கி வைத்தும் பேசிய அவர், தமிழக இளைஞர்களுக்கு வேலைவாய்ப்புகளை உருவாக்கவும், மாநிலத்தின் உள்கட்டமைப்பு வளர்ச்சியை முன்னெடுக்கவும் மத்திய அரசு தேவையான உதவிகளை வழங்கும் என்று உறுதியளித்தார்.

கோவை, மதுரை மெட்ரோ மற்றும் நதிநீர் இணைப்பு திட்டங்களுக்கு விஜய் கோரிக்கை!

நிகழ்ச்சியில் பேசிய முதல்வர் விஜய், சென்னை மட்டுமின்றி தமிழகத்தின் ஒவ்வொரு மாவட்டத்துக்கும் வளர்ச்சியின் பயன் சென்றடைய வேண்டும் என்பதைத் தனது அரசு நோக்கமாகக் கொண்டுள்ளதாகத் தெரிவித்தார்.

மத்திய அரசும் மாநில அரசும் இணைந்து செயல்படும்போது, அதன் பலன்கள் மக்களின் வாழ்க்கையில் நேரடியாகப் பிரதிபலிக்க வேண்டும் என்றும் அவர் வலியுறுத்தினார்.

இதன் ஒரு பகுதியாக, கோவை மற்றும் மதுரை மெட்ரோ ரயில் திட்டங்களை மறுபரிசீலனை செய்து ஒப்புதல் வழங்க வேண்டும் என்று பிரதமர் மோடியிடம் கோரிக்கை வைத்தார்.

சென்னை மெட்ரோ ரயில் மூன்றாம் கட்டத் திட்டத்துக்கும், ஓசூர் – பெங்களூரு திட்டத்துக்கும் ஆதரவு அளிக்க வேண்டும் என்றும் கேட்டுக்கொண்டார்.
மேலும், சென்னை உயர் நீதிமன்றத்தில் தமிழை வழக்காடு மொழியாக அறிவிக்க வேண்டும் என்ற கோரிக்கையையும் முன்வைத்தார்.

குறிப்பாக பிரதமருக்கு முக்கியமான வேண்டுகோள் என்று பேசிய முதலமைச்சர் விஜய் நதிநீர் இணைப்பு திட்டங்களை செயல்படுத்த வேண்டும் என்று கேட்டுக்கொண்டார். 

வளர்ச்சித் திட்டங்களில் இணைந்து செயல்படுமா மத்திய – மாநில அரசுகள்?

சென்னையில் மெட்ரோ ரயில் சேவை விரிவாக்கம், தேசிய நெடுஞ்சாலை மற்றும் ரயில்வே உள்கட்டமைப்புத் திட்டங்கள் உள்ளிட்ட பல்வேறு திட்டங்களைப் பிரதமர் தொடங்கி வைத்துள்ள நிலையில், கோவை, மதுரை மெட்ரோ திட்டங்கள் தொடர்பான விஜய்யின் கோரிக்கை முக்கியத்துவம் பெற்றுள்ளது.

தமிழகத்தின் வளர்ச்சிப் பயணத்தில் மாநில அரசுடன் இணைந்து செயல்படத் தயாராக இருப்பதாகப் பிரதமர் தெரிவித்துள்ள நிலையில், கோவை, மதுரை மெட்ரோ திட்டங்களின் மறுபரிசீலனை மற்றும் ஒப்புதல் தொடர்பான அடுத்தகட்ட நடவடிக்கைகள் எதிர்பார்ப்பை ஏற்படுத்தியுள்ளன.