மத போதகருக்கு தூக்கு தண்டனை.... நெல்லை நீதிமன்றம் அதிரடி!

T.அண்ணாதுரை,

திருநெல்வேலி மாவட்டம் மேலஇலந்தகுளம் பகுதியில் நான்கு சிறுமிகளுக்கு பாலியல் வன்கொடுமை செய்ததாக தொடரப்பட்ட போக்சோ வழக்கில், கிறிஸ்தவ மதபோதகர் ஆபிரகாம் (47) என்பவருக்கு தூக்குத் தண்டனை விதித்து திருநெல்வேலி போக்சோ சிறப்பு நீதிமன்றம் உத்தரவிட்டதாக தெரிவிக்கப்பட்டுள்ளது.

கங்கைகொண்டான் பகுதியைச் சேர்ந்த ஆபிரகாம் மதபோதகராக செயல்பட்டு வந்ததாகவும், பல்வேறு மாவட்டங்களுக்கு பெண்கள் மற்றும் குழந்தைகளை அழைத்துச் சென்று மதப்பணிகளில் ஈடுபட்டு வந்ததாகவும் கூறப்படுகிறது.

கடந்த 2022-ம் ஆண்டு மதப்பணிக்காக அழைத்துச் செல்லப்பட்ட ஒரே குடும்பத்தைச் சேர்ந்த 12, 13 மற்றும் 8 வயது சிறுமிகள் உள்ளிட்ட நான்கு சிறுமிகளிடம் அவர் பாலியல் வன்கொடுமையில் ஈடுபட்டதாக வழக்கில் குற்றச்சாட்டு முன்வைக்கப்பட்டது.

இதுகுறித்து சிறுமிகள் தெரிவித்த தகவலின் அடிப்படையில், அவர்களின் பெற்றோர் அளித்த புகாரின் பேரில் திருநெல்வேலி மாவட்ட ஊரக அனைத்து மகளிர் போலீசார் போக்சோ சட்டத்தின் கீழ் வழக்குப்பதிவு செய்து ஆபிரகாமை கைது செய்தனர்.

தொடர்ந்து, மாவட்ட காவல் கண்காணிப்பாளர் உத்தரவின்பேரில் கூடுதல் எஸ்.பி. சண்முகம் தலைமையிலான போலீசார் விசாரணை மேற்கொண்டனர். வழக்கு விசாரணையின்போது சாட்சிகள் நீதிமன்றத்தில் ஆஜர்படுத்தப்பட்டனர்.

இந்நிலையில், இறுதி விசாரணையில் குற்றம் நிரூபிக்கப்பட்டதாகக் கூறப்பட்டதைத் தொடர்ந்து, ஆபிரகாமுக்கு தூக்குத் தண்டனை விதித்து நீதிபதி சுரேஷ்குமார் உத்தரவிட்டதாக தெரிவிக்கப்பட்டுள்ளது.

மேலும், பாதிக்கப்பட்ட நான்கு சிறுமிகளுக்கும் தலா ரூ.10 லட்சம் இழப்பீடு வழங்க தமிழக அரசுக்கு நீதிமன்றம் உத்தரவிட்டதாகவும் கூறப்படுகிறது.

குழந்தைகளுக்கு எதிரான பாலியல் குற்றங்களில் கடுமையான தண்டனை வழங்கப்படுவது, இதுபோன்ற குற்றங்களைத் தடுப்பதில் முக்கியமான நடவடிக்கையாக பார்க்கப்படுகிறது.