ஆறு பத்திரிகையாளர்கள் கைது! எகிப்தில் சுதந்திர ஊடகத்தின் ஒட்டுமொத்த செய்திக் குழுவும் சிறைபிடிப்பு!

செய்தி: ம.பா. கெஜராஜ்,

எகிப்து நாட்டில் சுதந்திர ஊடக நிறுவனத்தைச் சேர்ந்த ஆறு பத்திரிகையாளர்கள் கைது செய்யப்பட்டுள்ள சம்பவம் சர்வதேச அளவில் பத்திரிகை சுதந்திரம் குறித்த விவாதத்தை ஏற்படுத்தியுள்ளது.

எகிப்தில் செயல்பட்டு வரும் 'மட்சதாஷ்' (Matsadaash) என்ற சுதந்திர ஊடக நிறுவனத்தின் செய்திக் குழுவைச் சேர்ந்த ஆறு பத்திரிகையாளர்களை அந்நாட்டு பாதுகாப்புப் படையினர் கைது செய்துள்ளனர்.

கடந்த செப்டம்பர் 28 மற்றும் 29-ம் தேதிகளில் பல்வேறு இடங்களில் மேற்கொள்ளப்பட்ட நடவடிக்கைகளின்போது இவர்கள் கைது செய்யப்பட்டதாகத் தகவல்கள் தெரிவிக்கின்றன.

2018-ம் ஆண்டு தொடங்கப்பட்ட இந்த ஊடக நிறுவனம், உண்மைச் சரிபார்ப்பு மற்றும் புலனாய்வுச் செய்திகளை வெளியிட்டு வருகிறது.

இந்நிலையில், கைது செய்யப்பட்ட பத்திரிகையாளர்கள் தடை செய்யப்பட்ட முஸ்லிம் சகோதரத்துவ அமைப்புடன் தொடர்புடையவர்கள் என்றும், வெளிநாட்டு நிதியுதவியுடன் தவறான செய்திகளைப் பரப்பியதாகவும் எகிப்து அதிகாரிகள் குற்றம்சாட்டியுள்ளனர்.

ஆனால், இந்தக் குற்றச்சாட்டுகளை ஊடக நிறுவனத்தின் இணை நிறுவனர் அப்தெல்ரஹ்மான் மன்சூர் மறுத்துள்ளார்.

கைது செய்யப்பட்ட பத்திரிகையாளர்களின் குடும்பத்தினரும் சட்டப் பிரதிநிதிகளும் அவர்களைத் தொடர்புகொள்ள முடியாத நிலை உள்ளதாகத் தெரிவிக்கப்பட்டுள்ளது.

கைது செய்யப்பட்ட ஆறு பேரும் எங்கு வைக்கப்பட்டுள்ளனர் என்பது குறித்த தகவலும் வெளியாகவில்லை.

இந்தச் சம்பவத்துக்கு எகிப்திய மனித உரிமைகள் அமைப்பான EIPR உள்ளிட்ட பல்வேறு சர்வதேச மனித உரிமை அமைப்புகள் கண்டனம் தெரிவித்துள்ளன.

கைது செய்யப்பட்டவர்களின் இருப்பிடத்தை உறுதிப்படுத்தி, அவர்களின் வழக்கறிஞர்கள் சந்திக்க அனுமதிக்க வேண்டும் என்றும், கைது நடவடிக்கைகள் குறித்து விசாரணை நடத்த வேண்டும் என்றும் கோரிக்கை விடுத்துள்ளன.

எகிப்து அதிகாரிகள் முன்வைத்துள்ள குற்றச்சாட்டுகள் நிரூபிக்கப்பட்டதாக இதுவரை தகவல் இல்லை. கைது செய்யப்பட்ட பத்திரிகையாளர்களுக்கு எதிரான சட்ட நடவடிக்கைகள் குறித்த முழுமையான விவரங்களும் தெளிவாகத் தெரியவில்லை.

ஒரு ஊடக நிறுவனத்தின் ஒட்டுமொத்த செய்திக் குழுவும் கைது செய்யப்பட்டுள்ள இந்தச் சம்பவம், பத்திரிகையாளர்களின் பாதுகாப்பு, கருத்துச் சுதந்திரம் மற்றும் சுதந்திரமான ஊடகச் செயல்பாடு தொடர்பான சர்வதேச கவனத்தைப் பெற்றுள்ளது.