ஐஜி பாலகிருஷ்ணன் மீது ரூ.5 கோடி லஞ்சம் குற்றச்சாட்டு – இன்ஸ்பெக்டர் சுகுமாறன் கைது, சஸ்பெண்ட்!

செய்தி: வல்லம் மகேசு,
தஞ்சாவூரில் செயல்பட்டு வரும் ஏ டு இசட் தனியார் மருத்துவமனையின் பங்குதாரர்களுக்கு இடையேயான பிரச்சினை, தற்போது காவல்துறை உயர் அதிகாரிகள் மீது எழுந்துள்ள ரூ.5 கோடி லஞ்சப் புகாரால் பெரும் பரபரப்பை ஏற்படுத்தியுள்ளது.

இந்த விவகாரத்தில் காவல்துறை உயர் அதிகாரி ஒருவர் ரூ.5 கோடி வரை லஞ்சம் கேட்டதாக மருத்துவமனை நிர்வாக இயக்குநர் சரவணன் புகார் அளித்துள்ளார்.

இந்தப் புகாரில் திருச்சி மத்திய மண்டல ஐஜி பாலகிருஷ்ணனின் பெயரும் இடம்பெற்றுள்ளதாகச் செய்திகள் தெரிவிக்கின்றன.

மருத்துவமனைப் பங்குதாரர்கள் இடையே மோதல்!

தஞ்சாவூர்–வல்லம் சாலையில் செயல்படும் ஏ டு இசட் மருத்துவமனையின் பங்குதாரர்களுக்கு இடையே உரிமை தொடர்பான பிரச்சினை ஏற்பட்டுள்ளது. இதுதொடர்பாக இரு தரப்பினரும் காவல்துறையிடம் புகார் அளித்துள்ளனர்.

இந்த விவகாரத்தில் மருத்துவமனை நிர்வாக இயக்குநர் சரவணன் உள்ளிட்டோர் மீது வழக்குப் பதிவு செய்யப்பட்டு, நிர்வாகத் தலைவர் ஆர்.எம். பாஸ்கரன் கைது செய்யப்பட்டதாகச் செய்திகள் தெரிவிக்கின்றன.

இதையடுத்து காவல்துறையினர் ஒருதலைப்பட்சமாகச் செயல்படுவதாக சரவணன் குற்றம்சாட்டியுள்ளார்.

ரூ.5 கோடி கேட்டதாகப் புகார்!

வழக்கிலிருந்து விடுவிப்பது உள்ளிட்ட நடவடிக்கைகளுக்காக காவல்துறை தரப்பில் ரூ.5 கோடி வரை கேட்கப்பட்டதாக சரவணன் புகார் அளித்துள்ளார்.

அதில் ரூ.3.25 கோடி ரொக்கமாகவும், ரூ.1.75 கோடி காசோலையாகவும் வழங்கப்பட்டதாக அவர் தெரிவித்ததாகச் செய்தி அறிக்கைகள் குறிப்பிடுகின்றன.

இந்தப் புகாரின் அடிப்படையில், தமிழக காவல்துறை தலைமை இயக்குநரிடம் முறையிடப்பட்டதைத் தொடர்ந்து, வழக்கு சிபிசிஐடி விசாரணைக்கு மாற்றப்பட்டது.

இன்ஸ்பெக்டர் சுகுமாறன் கைது!

விசாரணையின் ஒரு பகுதியாக, தஞ்சாவூர் மாவட்டக் குற்றப்பிரிவு காவல் ஆய்வாளர் கோ. சுகுமாறனின் வீட்டில் சிபிசிஐடி போலீசார் சோதனை நடத்தி, தொடர்ந்து, அக்டோபர் 9ஆம் தேதி அவரைக் கைது செய்தனர்.

கைது நடவடிக்கைக்குப் பிறகு அவர் மருத்துவமனையில் அனுமதிக்கப்பட்டதாகவும், நீதிமன்ற நடவடிக்கைகளுக்குப் பின்னர் நீதிமன்றக் காவலில் வைக்கப்பட்டதாகவும் செய்திகள் தெரிவிக்கின்றன.

பணியிடைநீக்கம் செய்யப்பட்ட காவல் ஆய்வாளர்!

லஞ்சப் புகார் தொடர்பாகக் கைது செய்யப்பட்ட காவல் ஆய்வாளர் சுகுமாறனைப் பணியிடைநீக்கம் செய்து தஞ்சாவூர் சரக காவல்துறை துணைத் தலைவர் ஜியாவுல் ஹக் உத்தரவிட்டுள்ளார்.

மேலும், அக்டோபர் 22ஆம் தேதி வெளியான செய்தியின்படி, சுகுமாறனிடம் ஒரு நாள் காவலில் வைத்து விசாரணை நடத்த சிபிசிஐடி போலீசாருக்கு நீதிமன்றம் அனுமதி வழங்கியுள்ளது.

உயர் அதிகாரிகள் மீதான புகார்: உண்மை வெளிவருமா?

ஒரு தனியார் மருத்துவமனையின் பங்குதாரர்களுக்கு இடையேயான பிரச்சினையில் தொடங்கிய இந்த விவகாரம், தற்போது காவல்துறை அதிகாரிகள் மீது எழுந்துள்ள கடுமையான குற்றச்சாட்டுகளாக மாறியுள்ளது.

ரூ.5 கோடி தொடர்பான பணப் பரிவர்த்தனை குறித்த புகாரில் யார் யாருக்குத் தொடர்பு உள்ளது? பணம் உண்மையில் கைமாறியதா? அதிகாரிகள் தங்களது பதவியைத் தவறாகப் பயன்படுத்தினார்களா? இந்தக் கேள்விகளுக்கு சிபிசிஐடி விசாரணை மூலம் தெளிவான பதில் கிடைக்க வேண்டும்.

காவல்துறையின் நம்பகத்தன்மையைப் பாதுகாக்கும் வகையில், குற்றச்சாட்டுகள் அனைத்தும் ஆதாரங்களின் அடிப்படையில் விசாரிக்கப்பட்டு, தவறு நிரூபிக்கப்படும் நபர்கள் மீது சட்டப்படி நடவடிக்கை எடுக்கப்பட வேண்டும் என்பதே பொதுமக்களின் எதிர்பார்ப்பாக உள்ளது.

குறிப்பு: இந்த வழக்கு சம்பந்தமாக இன்ஸ்பெக்டர் சுகுமார் கைது செய்யப்பட்டு இருக்கிற நிலையில் அவர்கள் வீட்டில் சோதனை இட்ட பொழுது ஐஜி பாலகிருஷ்ணனுக்கு இதில் முக்கிய பங்கு இருப்பதாக ஆதாரம் கிடைத்துள்ளதாம்.

இது போன்ற ஆபீஸர்களுக்கு சல்யூட் வைக்கலாமா இல்ல வேற எதிலாவது அடிக்கலாமா?