அமைச்சர் ஸ்டாராக இருப்பதால், துறையும் ஸ்டாராகவிட்டது! உதயநிதியை வெளிப்படையாகவே புகழ்ந்த முதல்வர் ஸ்டாலின்!
admin
ஜி.சாந்தகுமார்,
அமைச்சர் ஒரு ஸ்டாராக இருப்பதால், இந்த துறையும் ஸ்டார் துறையாக வளர்ந்துவிட்டது" என்று மகன் உதயநிதியை முதல்வர் ஸ்டாலில் வெளிப்படையாகவே புகழ்ந்து பேசினார்.
சீனாவின் ஹாங்சூ நகரில் நடைபெற்ற 19வது ஆசிய விளையாட்டுப் போட்டிகளில் பதக்கங்கள் வென்ற தமிழகத்தைச் சார்ந்த வீரர்கள் மற்றும் வீராங்கனைகளுக்கு ஊக்கத்தொகை வழங்கும் நிகழ்ச்சி சென்னையில் இன்று நடைபெற்றது. அதில் முதலமைச்சர் மு.க.ஸ்டாலின், விளையாட்டுத் துறை அமைச்சர் உதயநிதி ஸ்டாலின் மற்றும் அதிகாரிகள் கலந்துகொண்டனர்.
அப்போது ஆசியப் போட்டிகளில் பதக்கங்கள் வென்ற தமிழக வீரர்களுக்கு பாராட்டு தெரிவித்த முதலமைச்சர் மு.க.ஸ்டாலின், அமைச்சர் உதயநிதியை வெளிப்படையாகவே பாராட்டினார். அத்துடன் உதயநிதியின் செயல்பாடுகள் குறித்தும் பெருமை பாராட்டினார்.
அதில் பேசிய முதலமைச்சர் மு.க.ஸ்டாலின், "இந்தியா மொத்தமாக வென்ற 107 பதக்கங்களில், தமிழ்நாட்டைச் சேர்ந்த வீரர்கள் மட்டும் 28 பதக்கங்களைப் பெற்றுள்ளனர். இந்திய அளவில் பார்த்தால் நமது மாநிலம் ஐந்தாவது இடத்தைப் பெற்றுள்ளது. தொடர்ச்சியான பதக்கங்கள் பெறுவதும், தொடர் வெற்றிகளைப் பெறுவதும்தான் உங்களுக்கும் பெருமை, தமிழ்நாட்டுக்கும் பெருமை; ஏன் இந்தியாவிற்கே பெருமை".
உங்களைப் பார்த்து இன்னும் ஏராளமான விளையாட்டு வீரர்களும், வீராங்கனைகளும் உருவாவார்கள் என நம்புவதாகக் குறிப்பிட்ட ஸ்டாலின், "எந்தவொரு அரசாக இருந்தாலும், ஏதாவது ஒரு குறிப்பிட்ட ஒரு சில துறைகளில் மட்டும் அதிக கவனம் செலுத்தும்.
ஆனால் திராவிட மாடல் அரசு, அனைத்துத் துறைகளிலும் அதிகக் கவனம் செலுத்தி, அனைத்துத் துறைகளையும் ஒருசேர வளர்த்து வந்து கொண்டிருக்கிறது. அதிலும் குறிப்பாக சில துறைகள் ஸ்டார் துறைகளாக வளர்ந்து வருகின்றன. அதில் விளையாட்டுத் துறையும் ஒன்று. இந்தத் துறையின் அமைச்சர் ஒரு ஸ்டாராக இருப்பதால், இந்த துறையும் ஸ்டார் துறையாக வளர்ந்துவிட்டது"¢.
விளையாட்டுத் துறையின் மூலமாக, விளையாட்டு வீரர்கள் மட்டுமல்ல ஒட்டுமொத்த இளைய சமுதாயமும் எழுச்சி பெற்று வருகிறது என்றும், நாள்தோறும் தமிழ்நாடு முழுவதும் ஏராளமான விளையாட்டுத் துறை நிகழ்ச்சிகள் நடந்து கொண்டே இருக்கின்றன. அதிலும், அமைச்சர் உதயநிதி நடந்து அல்ல, ஓடிக் கொண்டே இருக்கிறார் என்று புகழ்ந்து தள்ளினார்.
