வேலூர் கலெக்டர் அலுவலகத்திற்கு பெயர் தந்த சிபி சிற்றரசு! சிலை அமைத்து வரலாற்றை நிலைநாட்ட வேண்டும் – குடும்பத்தினர், ஊர்மக்கள் கோரிக்கை*!

செய்தி: ம.பா.கெஜராஜ்,
வேலூர்: வேலூர் மாவட்டத்தின் சமூக, அரசியல், இலக்கிய வரலாற்றில் தனக்கென அழியாத தடம் பதித்தவர் மறைந்த சி.பி.சிற்றரசு. திராவிட இயக்கத்தின் கொள்கைகளுக்காகவும், சமூக நீதிக்காகவும் தொடர்ந்து குரல் கொடுத்ததுடன், எழுத்து, இதழியல், நாடகம், திரைப்படம் என பல்வேறு தளங்களில் தனது ஆளுமையைப் பதிவு செய்தவர்.

அவரது அர்ப்பணிப்பையும், சமூகப் பணிகளையும் போற்றும் வகையில் வேலூர் மாவட்ட ஆட்சியர் அலுவலகத்திற்கு சி.பி.சிற்றரசு பெயர் சூட்டப்பட்டுள்ளது. இந்நிலையில், அவரது நினைவை மேலும் சிறப்பிக்கும் வகையில், வேலூர் மாவட்ட ஆட்சியர் அலுவலக வளாகத்தில் அவருடைய முழு உருவச் சிலையை நிறுவ வேண்டும் என்று அவரது குடும்பத்தினரும், அவரது சொந்த ஊரைச் சேர்ந்த பொதுமக்களும் கோரிக்கை விடுத்துள்ளனர்.

‘தீப்பொறி’ முதல் ‘நம் நாடு’ வரை...

சி.பி.சிற்றரசு அவர்களின் எழுத்துப் பயணம் நீண்டதும் சிறப்புமிக்கதுமாகும்.
1952-ம் ஆண்டு ஆகஸ்டு 22-ம் தேதி ‘தீப்பொறி’ என்ற வார இதழைத் தொடங்கினார். தொடர்ந்து 1956-ம் ஆண்டு மே 3-ம் தேதி ‘தீச்சுடர்’ என்ற இதழைத் தொடங்கினார். 1959-ம் ஆண்டு ‘இனமுழக்கம்’ இதழின் ஆசிரியராகப் பணியாற்றினார்.

திராவிட முன்னேற்றக் கழகத்தின் செயற்குழு மற்றும் பொதுக்குழு உறுப்பினராக இருந்த சி.பி.சிற்றரசு, கழகத்தின் அதிகாரப்பூர்வ இதழான ‘நம் நாடு’ இதழின் ஆசிரியராகவும் பணியாற்றியதுடன், அந்த இதழைத் தொடங்கியவராகவும் குறிப்பிடத்தக்க பங்களிப்பைச் செய்தார்.

அவர் நடத்தி வந்த இதழ்கள் வாயிலாக சமூகப் பிரச்சினைகள், அரசியல், சிந்தனைகள் மற்றும் திராவிட இயக்கக் கொள்கைகளை மக்களிடம் கொண்டு சென்றார்.
நாடகம், இலக்கியம், திரைப்படம் என பன்முக ஆளுமை!
சி.பி.சிற்றரசு எழுத்துத் துறையில் இதழியல் மட்டுமின்றி, நாடகம், இலக்கியம், திரைக்கதை, வசனம் என பல்வேறு தளங்களிலும் தனது திறமையை வெளிப்படுத்தியவர்.

கட்சிப் பிரச்சாரத்திற்காக ஏராளமான நாடகங்களையும் குறுங்கட்டுரைகளையும் எழுதியுள்ளார். அவர் நடத்தி வந்த இதழ்களில் ஐரோப்பிய அரசியல் தலைவர்கள் மற்றும் சிந்தனையாளர்கள் குறித்த சிறு வரலாறுகளையும் எழுதியுள்ளார்.
மேடைப் பேச்சுக்கேற்ற வலிமையான மொழிநடையில், திராவிட இயக்கக் கொள்கைகளை விளக்கும் பல்வேறு நூல்களையும் எழுதியுள்ளார். அவரது படைப்புகளில் அரசியல் சிந்தனை, சமூகநீதி, பகுத்தறிவு மற்றும் திராவிட இயக்கக் கருத்துகள் முக்கிய இடம் பெற்றன.

1950-களில் சுமார் ஓராண்டு மாடர்ன் தியேட்டர்ஸ் திரைப்பட நிறுவனத்தில் திரைக்கதை எழுத்தாளராகவும் பணியாற்றினார். மேலும், 1960-ம் ஆண்டு வெளியான ‘ஆட வந்த தெய்வம்’ திரைப்படத்திற்கு வசனம் எழுதியுள்ளார்.
இதன் மூலம் சி.பி.சிற்றரசு அவர்கள் ஒரு அரசியல் இயக்கத்தின் செயல்பாட்டாளராக மட்டுமல்லாமல், எழுத்தாளர், இதழாசிரியர், நாடக ஆசிரியர், திரைக்கதை மற்றும் வசனகர்த்தா, சிந்தனையாளர் என பன்முகத் திறமை கொண்டவராக விளங்கியிருப்பது தெரியவருகிறது.

“பெயர் மட்டும் போதுமா? சிலையும் அமைக்க வேண்டும்!”
இத்தகைய சிறப்புமிக்க வரலாற்றைக் கொண்ட சி.பி.சிற்றரசு அவர்களின் பெயரில் வேலூர் மாவட்ட ஆட்சியர் அலுவலகம் இயங்கி வருவது பெருமைக்குரியதாக இருந்தாலும், அவரது நினைவை அடுத்த தலைமுறைக்கும் கொண்டு செல்லும் வகையில் அதே வளாகத்தில் அவருடைய முழு உருவச் சிலையை நிறுவ வேண்டும் என்பதே குடும்பத்தினர் மற்றும் ஊர்மக்களின் முக்கிய கோரிக்கையாக உள்ளது.

அவருடைய நீண்ட அரசியல், சமூக, இலக்கியப் பயணத்தையும், மக்களுக்காக அவர் ஆற்றிய பணிகளையும் இன்றைய தலைமுறையும், வருங்கால தலைமுறையும் அறிந்து கொள்ளும் வகையில் அவரது சிலை அமைக்கப்பட வேண்டும்” என குடும்பத்தினர் மற்றும் பொதுமக்கள் தெரிவிக்கின்றனர்.
மேலும், சிலை அருகே சி.பி.சிற்றரசு அவர்களின் வாழ்க்கை வரலாறு, இதழியல் பணி, இலக்கியப் பங்களிப்பு, நாடகங்கள் மற்றும் திரைப்படத் துறையில் அவர் ஆற்றிய பணிகள் குறித்த தகவல்களுடன் நினைவுப் பலகையும் அமைக்க வேண்டும் என்றும் கோரிக்கை விடுக்கப்பட்டுள்ளது.

வேலூர் மாவட்டத்தின் வரலாற்றில் முக்கிய இடம் பெற்ற சி.பி.சிற்றரசு அவர்களின் நினைவாக அவரது பெயர் மாவட்ட ஆட்சியர் அலுவலகத்திற்கு சூட்டப்பட்டுள்ள நிலையில், அவரது சிலையையும் அங்கு நிறுவுவதற்கான நடவடிக்கையை மாவட்ட நிர்வாகம் மேற்கொண்டால், அது அவரது குடும்பத்தினருக்கு மட்டுமல்லாமல், வேலூர் மாவட்டத்தின் சமூக, இலக்கிய மற்றும் இதழியல் வரலாற்றுக்கும் வழங்கப்படும் உரிய மரியாதையாக அமையும் என்பதே அனைவரின் எதிர்பார்ப்பாக உள்ளது.