சத்யபாமா குறித்த ஸ்டாலின் பேச்சு! முதலமைச்சர் விஜய் கடும் கண்டனம் – “பெண்களை இழிவுபடுத்துவதை ஏற்க முடியாது!

செய்தி: ம.பா. கெஜராஜ்,

சென்னை: தாராபுரம் இடைத்தேர்தல் பிரச்சாரத்தின்போது தவெக வேட்பாளர் சத்யபாமா குறித்து திமுக தலைவர் மு.க.ஸ்டாலின் பேசிய கருத்துகளுக்கு முதலமைச்சர் விஜய் கடும் கண்டனம் தெரிவித்துள்ளார்.

இதுதொடர்பாக அவர் வெளியிட்டுள்ள அறிக்கையில், தாராபுரம் தொகுதியில் நடைபெற்ற தேர்தல் பிரச்சாரக் கூட்டத்தில் சத்யபாமா குறித்து ஸ்டாலின் உருவக்கேலி செய்து, அநாகரிகமாகப் பேசியுள்ளதாகக் குற்றம்சாட்டியுள்ளார்.

பெண்கள் குறித்துப் பொதுவெளியில் பேசும்போது அரசியல் தலைவர்கள் பொறுப்புடன் நடந்துகொள்ள வேண்டும் என்பதை வலியுறுத்தியுள்ள விஜய், பெண்களை இழிவுபடுத்தும் வகையிலான பேச்சுகளுக்கு எதிராகத் தனது கண்டனத்தைப் பதிவு செய்துள்ளார்.

திமுகவின் அரசியல் அணுகுமுறை குறித்து விமர்சித்துள்ள அவர், ஜனநாயகத்துக்கு விரோதமான செயல்களில் திமுகவினர் ஈடுபடுவதாகவும் குற்றம்சாட்டியுள்ளார்.

மேலும், பெண்கள் குறித்துப் பேசும்போது அவர்களின் உணர்வுகளுக்கும் மரியாதை அளிக்கப்பட வேண்டும் என்றும் தனது அறிக்கையில் குறிப்பிட்டுள்ளார்.

தமிழகப் பெண்களின் மகனாகவும், சகோதரனாகவும் தன்னை முன்னிறுத்தி, பெண்கள் குறித்து அவதூறாகப் பேசுவதாகத் தான் கருதும் திமுகவின் செயல்பாடுகளுக்கு எதிராகக் கடும் கண்டனத்தைத் தெரிவித்துக் கொள்வதாக விஜய் கூறியுள்ளார்.

தாராபுரம் இடைத்தேர்தல் பிரச்சாரத்தில் சத்யபாமா குறித்துப் பேசப்பட்ட கருத்துகள் தொடர்பாக ஏற்கெனவே மார்க்சிஸ்ட் கம்யூனிஸ்ட் கட்சியின் மாநிலச் செயலாளர் பெ.சண்முகமும் கண்டனம் தெரிவித்துள்ள நிலையில், முதலமைச்சர் விஜய்யின் அறிக்கையும் அரசியல் களத்தில் பரபரப்பை ஏற்படுத்தியுள்ளது.

தேர்தல் பிரச்சாரத்தில் வேட்பாளர்களின் கொள்கைகள், செயல்பாடுகள் குறித்த விமர்சனங்களைக் கடந்து, தனிப்பட்ட தோற்றம் தொடர்பான கருத்துகள் விவாதப் பொருளாக மாறியுள்ளன.