கணவனை இழந்த ஏழைப் பெண்ணின் வீட்டை இடித்துத் தள்ளிய அதிகாரிகள்! ₹50 ஆயிரம் கேட்டதாகப் புகார் – மாவட்ட ஆட்சியர் விசாரிப்பாரா

செய்தி: செ.கவி பிரியன்,

திருப்பத்தூர் மாவட்டம், சொரக்கல்நத்தம் ஊராட்சிக்கு உட்பட்ட கிணற்றுக்கொல்லை பகுதியில், கணவனை இழந்து இரண்டு பெண் குழந்தைகளுடன் வசித்து வரும் பெண்ணின் வீட்டுக் கட்டுமானப் பணிகள் அகற்றப்பட்ட சம்பவம் அப்பகுதியில் அதிர்ச்சியை ஏற்படுத்தியுள்ளது.

அப்பகுதியைச் சேர்ந்த சம்பூர்ணத்தின் கணவர் சுமார் 15 ஆண்டுகளுக்கு முன்பு உயிரிழந்துள்ளார். இதையடுத்து, இரண்டு பெண் குழந்தைகளுடன் குடிசை வீட்டில் வசித்து வந்துள்ளார்.

பழைய குடிசை வீடு சேதமடைந்ததுடன், விஷப்பூச்சிகளால் பாதிப்பு ஏற்படும் அச்சமும் இருந்ததாகக் கூறப்படுகிறது. இதனால், கடன் பெற்று செங்கற்களால் புதிய வீடு கட்டும் பணியைத் தொடங்கியுள்ளார்.

₹50 ஆயிரம் கேட்டதாகப் புகார்!

வீடு கட்டும் பணி நடைபெற்று வந்தபோது, வட்டாட்சியர் அலுவலகத்தைச் சேர்ந்த ஒருவர், வட்டாட்சியரின் பெயரைக் குறிப்பிட்டு ₹50,000 வழங்க வேண்டும் என்று கேட்டதாகப் புகார் தெரிவிக்கப்படுகிறது.

ஏற்கெனவே வறுமையில் வாடி, கடன் பெற்று வீடு கட்ட முயன்றுவரும் குடும்பத்தினரால் இவ்வளவு தொகையை வழங்க முடியாத சூழல் இருந்ததாகக் கூறப்படுகிறது.

இந்தப் பணம் கேட்கப்பட்டதாகக் கூறப்படும் புகாரின் உண்மைத்தன்மை குறித்து விசாரணை நடத்தப்பட வேண்டும். யார் பணம் கேட்டது, எந்த அடிப்படையில் கேட்டது, இதற்கான ஆதாரங்கள் உள்ளனவா என்பதையும் மாவட்ட நிர்வாகம் ஆய்வு செய்ய வேண்டும்.

ஜேசிபி மூலம் கட்டுமானப் பணிகள் அகற்றம்!

அரசுக்குச் சொந்தமான இடத்தில் வீடு கட்டுவதாகக் கூறி, நாட்றம்பள்ளி வட்டாட்சியர் சம்பவ இடத்திற்குச் சென்று சம்பூர்ணத்தின் குடும்பத்தினரை எச்சரித்ததாகத் தெரிவிக்கப்படுகிறது.

இந்நிலையில், நேற்று அதிகாலை ஜேசிபி இயந்திரம் மூலம் கட்டுமானப் பணிகள் அகற்றப்பட்டதாகக் கூறப்படுகிறது. வீடு கட்டுவதற்காக அடுக்கி வைக்கப்பட்டிருந்த செங்கற்கள், கதவுகள், ஜன்னல்கள் உள்ளிட்ட பொருட்களும் அகற்றப்பட்டதாகத் தகவல்கள் தெரிவிக்கின்றன.

இதனால், புதிய வீடு கட்டலாம் என்ற நம்பிக்கையில் கடன் வாங்கிய சம்பூர்ணம், தனது இரண்டு பெண் குழந்தைகளுடன் என்ன செய்வதென்று தெரியாமல் தவித்து வருவதாகக் கூறப்படுகிறது.

ஏழைகளிடம் அதிகாரம் காட்டுவதுதான் நிர்வாகமா?

அரசுக்குச் சொந்தமான இடத்தில் ஆக்கிரமிப்பு இருந்தால், அதைச் சட்டப்படி அகற்றுவதற்கான நடவடிக்கைகளை அதிகாரிகள் மேற்கொள்ளலாம்.

ஆனால், வீடற்ற நிலையில் வாழும் ஏழைக் குடும்பத்தின் நிலை, அவர்களுக்கு வழங்கப்பட்ட முன்னறிவிப்பு, சட்ட நடைமுறைகள் பின்பற்றப்பட்டனவா என்பனவும் ஆய்வு செய்யப்பட வேண்டியவை.

அதேபோல் இந்த வட்டத்தில் முன்னாள் அமைச்சர் ஒருவர் பெட்ரோல் பங்க் தொடர்பாக மூன்று ஏக்கர் ஆக்கிரமிப்பு செய்திருப்பதாகவும் தகவல் அதே போல் அடுக்கு மாடி கட்டிடங்கள் பல அரசு புறம்போக்கு இடத்தில் கட்டப்பட்டிருக்கிறது அங்கெல்லாம் போய் வீரத்தை காட்டாத மேற்படி அதிகாரிகள் ஐம்பதாயத்திற்காக இப்படி செய்திருப்பது மனித நியாயமற்ற செயலின் உச்சகட்டமாகும்.

அதே நேரத்தில், அரசு அதிகாரியின் பெயரைப் பயன்படுத்தி பணம் கேட்டதாக எழுந்துள்ள புகாரும் சாதாரணமாகக் கடந்து செல்லக்கூடியதல்ல. அந்தப் புகாரில் உண்மை இருந்தால், சம்பந்தப்பட்ட நபர் மீது உரிய நடவடிக்கை எடுக்கப்பட வேண்டும்.

மாவட்ட ஆட்சியர் தலையிட்டு விசாரிப்பாரா?

திருப்பத்தூர் மாவட்ட ஆட்சியர் இந்த விவகாரத்தில் நேரடியாகத் தலையிட்டு, சம்பூர்ணத்தின் வீட்டுக் கட்டுமானம் ஏன் அகற்றப்பட்டது, உரிய சட்ட நடைமுறைகள் பின்பற்றப்பட்டனவா, ₹50,000 கேட்டதாகக் கூறப்படும் புகாரில் உண்மை உள்ளதா என்பதைக் குறித்து விசாரணை நடத்த வேண்டும் என்ற கோரிக்கை எழுந்துள்ளது.

வீடற்ற நிலையில் தவிக்கும் சம்பூர்ணத்தின் குடும்பத்திற்கு அரசின் வீட்டு வசதித் திட்டங்களின் கீழ் வீடு வழங்க இயலுமா என்பதையும் ஆய்வு செய்து, தகுதியின் அடிப்படையில் உதவி வழங்க மாவட்ட நிர்வாகம் முன்வர வேண்டும் என்பதே அப்பகுதி மக்களின் எதிர்பார்ப்பாக உள்ளது.

குறிப்பு. வீடு இழந்த பெண்ணுக்கு இரண்டு பெண் பிள்ளைகள் உள்ளனர். எம் அவர்கள் அருகில் உள்ள பள்ளியில் படித்து வருகின்றனர். 

இந்நிலையில் யோக்கிய அதிகாரிகள் அதிகாலையில் வீட்டை இடித்த செயலினால் பிள்ளைகளின் புத்தகங்கள் எல்லாம் மழையில் நனைந்து நடுரோட்டில் விடப்பட்டிருக்கிறார்கள். 

இந்தப் படு பாதக செயலை செய்த அதிகாரி இந்த மாத சம்பளத்தை வாங்கும் போது, அவருக்கு மனசாட்சி குத்த வேண்டும்.