உதயநிதி தலைக்கு ரூ.25 கோடி! அடங்காத சாமியாரின் ரவுடியிசம்!!

ம.பா.கெஜராஜ்,

 தமிழ்நாடு அமைச்சர் உதயநிதி தலைக்கு ரூ.25 கோடி என உயர்த்தி கொடுப்பதாக ரவுடி சாமியார் பரமஹன்ஸ்  அடங்காமல் கூவியிருக்கிறார். ஆயிரக்கணக்கான ஆச்சாரியார்கள் கொண்ட தர்மசபையை கூட்டி ஆலோசனை செய்தே இந்த முடிவை எடுத்தாராம்.

 அயோத்தி தபஸ்வீமடத்தின் தலைவரும், துறவியான ஜெகத்குரு பரமஹன்ஸ் ஆச்சாரியாவிடம் நிருபர்கள் கேட்ட கேள்விகளுக்கு அளித்த பதில்கள் வருமாறு:-

 மற்ற மதங்களை உதயநிதி விமர்சித்திருந்தால் அவர் இன்று என்னவாகி இருப்பாரோ தெரியவில்லை. பா.ஜ.க.வின் தலைவர் நுபுர் சர்மா, இஸ்லாமியர்களின் ஹதீஸ் மறையில் இருப்பதைத்தான் எடுத்துரைத்தார். ஆனால் அவருக்கு கிளம்பிய எதிர்ப்பால் நுபுரை கட்சியில் இருந்து நீக்கி பா.ஜ.க.நடவடிக்கை எடுத்தது. ஆனால், உதயநிதி மீது எந்த நடவடிக்கையும் இல்லை.  தமிழக அமைச்சர் உதயநிதி தனது தவறை உணர்ந்து மன்னிப்பு கேட்டு விடுவார் என எதிர்பார்த்தேன். இதை அவர் செய்யாததால்தான் நான் அவரது கழுத்தை வெட்டி வருவோருக்கு ரூ.10 கோடி பரிசு என அறிவித்தேன்.

 அதற்கு பின்பும் அவர் தனது தலையை சீவ ரூ.10 கோடி தேவையில்லை, 10 ரூபாய் சீப்பு போதுமானது என  நக்கல் செய்துள்ளார். இதனால் 2 தினங்களுக்கு முன் ஆயிரக்கணக்கான ஆச்சாரியார்கள் கொண்ட தர்மசபையை கூட்டி ஆலோசனை செய்தேன். அவர் தனது வார்த்தைகளை வாபஸ் பெற்றால் நாமும் நம் எச்சரிக்கையை வாபஸ் பெறுவோம். இல்லையெனில் எங்கு ஒளிந்திருந்தாலும் அவர் எங்களிடமிருந்து தப்ப முடியாது.

  மேலும், அவர் தலையை வெட்டி நான் அறிவித்த ரூ.10 கோடியை தற்போது ரூ.25 கோடியாக உயர்த்தி அறிவித்துள்ளேன். அவர் தனது தவறை உணர்ந்து மன்னிப்பு கேட்க வேண்டும் என நாம் விரும்புகிறோம். சனாதனத்தின் மீது நம்பிக்கை இல்லை எனில் உதயநிதி வேறு மதத்திற்கு மாறிக் கொள்ளலாம். இதை விடுத்து அவர் சனாதனத்தை ஒழிப்பேன் எனக் கூறுவது ஏற்புடையது அல்ல.

   இது உலகம் முழுவதிலும் அமைதியை குலைக்கும் செயல். இவருக்கு பின் ஆ.ராசாவும் இதேபோன்று விமர்சித்தது தவறு. பாரதத்தில் சனாதனத்தை மதித்து அதன் மீது நம்பிக்கை கொண்டவர்கள் சுமார் 120 கோடி பேர் உள்ளனர். 5,000 ஆண்டுகளுக்கு முன் சனாதனம் மட்டுமே இருந்தது. வேறு எந்த மதங்களும் இல்லை. இதன் குறிப்பு பழம்பெருமை வாய்ந்த ஆன்மிக நூலான ரிக் வேதத்திலும் உள்ளது. சனாதனத்தை ஒழிக்க நினைப்பவர் அதை மதிக்கும் நாட்டின் 80 சதவீத மக்களை அழிக்க முயல்வதாகவே அர்த்தம் என்று சொல்லியிருக்கிறார்.